Wat het geword van SB7-SB12?

SB7, 8 en 9 is al 3 op 16 April gemaak. SB7 was kafee olie seep waar ek van 'n vorige batch se gemaalde spaghetti vorms in die nat seep gegiet het. Dit is die twee lang ovaal vorms op Foto 1 hieronder. Van die mengsel wat te veel was het ek in 'n jogurt bakkie gegiet, heel regs, en die res in 'n leë soutkoekie houer. Dit was 'n interessante eksperiment en die gemaalde seep het baie mooi met die nat mengsel gebind en 'n baie mooi patroon gelaat wanneer die seep deurgesny is.
Die soutkoekie houer se swart plastiek het die buitekant van daardie seep donkerder gekleur, so ek sal dit nou nie sommer weer as gietvorm gebruik nie aangesien die plastiek so afgee aan die seep. Op Foto 2, geneem na 'n maand se kuur, kan jy sien waar die donker buiterand afgesny is en die ligter binnekant wys. Met die 250ml jogurt bakkie vorm was dit baie moeilik om die seep uit te kry, so dit sal nou ook nie sommer weer gebeur nie.
Ek het hierdie batch gekleur met 'wheat grass' poeier, maar op Foto 2 is dit duidelik dat die groen nie juis gehou het nie. Sitronella olie is bygevoeg vir reuk, en na 'n maand ruik dit nog vars. Die seep het bie vinnig begin stol so ek sal op 'n vroeër stadium moet begin om al die bykomstighede by te voeg sodat dit nie so dik raak voor ek dit in die houers het nie. Hierdie behoort teen 31 Mei reg te wees.
Ek sukkel nog om die seep in ewe groot blokke gesny te kry en sal moet 'n sny sjabloon van een of ander aard ontwikkel, want ek kan nie al daai dollars vir 'n 'fancy' Amerikaanse seepsnyer uithaal nie.

Foto 1, SB 7 en 9 [silinder links voor]

Foto 2, SB7 gesny

Foto 3, SB 8 en 9 pas uit die gietvorms en reg om te droog

Foto 4, SB 8 en 9 na 'n maand se kuur

SB8 [sien Foto 3, die ligter kleur sepies] was van gebruikte olie waarin varktjops gebraai is.  Vir kleur voeg ek paprika by, probeer vanilla essens en reukolie, en gooi gemaalde vlassaad by om 'n eksfoliasie effek aan die seep te gee. dit word gegiet is plastiek bakkies wat reeds 'n klassieke seep vorm lewer, dus poog ek om die sny probleem so op te los. Intussen het ek ook 'n silikon gietvorm aangeskaf wat die ronde sepies vorm.
Die mengsel vat baie lank om te begin traseer en later span ek die staafmenger in om die proses aan te help. Dit stol ook nie so vinnig nie en ek het genoeg tyd om met 'n sosatiestokkie patrone bo-op te maak voordat ek dit eenkant sit om te droog. Twee dae later toe ek dit uit die gietvorms haal het die seep 'n gladde tekstuur soos varkvet seep, en ek is eintlik bietjie spyt dat ek die vlassaad bygesit het. Die reuk was reeds hier nie baie sterk nie. Op Foto 4 is die ligter sepie die van SB 8 na 'n maand se kuur. Daar is steeds 'n ligte reuk aan die seep en die tekstuur bly glad en aangenaam om aan te voel.

SB9 was 'n mengsel van kafee olie en varktjop olie. Omdat SB8 baie lank geneem het om te traseer het ek besluit om die twee olies te meng. Op hierdie manier gee dit die sonneblom van die kafee olie 'n sagter tekstuur, en die tyd wat dit neem om te traseer is bietjie stadiger as skoon kafee olie en bietjie vinniger as die varkvet olie mengsel. Ek gooi ongebruikte gemaalde koffie by en vanilla essens. Dit word gegiet in 'n Pringles houer, sien silinder vorm op Foto 1, en van die bakkies wat soos 'n sepie gevorm is, donkerder seep op Foto 3.
My aanname rakende die traseer tyd was korrek. Die reaksie neem langer as kafee olie alleen, maar nie so lank dat ek die staafmenger benodig nie. Die bakkies werk goed om die seep te vorm, maar die seep wat in die Pringles houer gegiet is vertoon mooier en ruik ook sterker as die in die bakkies nadat dit uit die gietvorms gehaal is.
Op Foto 4 is die seep nadat dit vir 'n maand gekuur het. die seep wat in die bakkies gegiet is het baie as om die kante gevorm terwyl die wat in die silinder vorm was nie het nie. Laasgenoemde se reuk is ook baie sterker as die wat in bakkies was. Dit ruik na 'n maand nog na vanilla koffie, maar die reuk is nie baie sterk nie.

Na SB7, 8 en 9 het ek tot die gevolgtrekking gekom dat ek beslis sal moet planmaak met die snyery, dat die silinder vorm die beste werk om die seep mooi te vorm en om die geure en kleure vas te vang, so die konsep moet verder ondersoek en ontwikkel word en aangesien ek nie 'n onbeperkte bron van Pringles houers het nie sal ek 'n ander plan moet maak.

SB10 en 11 maak ek op 27 April 2016 en dit was so onnoemenswaardig dat ek nie eers fotos daarvan het nie. My sussie het vir my twee bottels ongebruikte atjar olie gegee wat wie weet hoe lank in haar spens gestaan het.  Eers het dit my ure geneem om vas te stel watse kleurmiddel in die olie gebruik is, want as dit rooipeper is sal die seep mens se vel brand en sal ek dit nie kan gebruik nie. Toe ek vasstel dat dit net met paprika so rooi gekleur word besluit ek om tog maar 'n poging aan te wend. Intussen het ek pietersielie en paprika in canola olie ingelê om te kyk of dit as kleurmiddel vir die seep sal deug. Boonop het pietersielie soveel ander vel voordele dat dit in my kop net goed kan wees om so te gebruik. Omdat die atjar olie reeds met paprika gekeur is besluit ek om net van die pietersielie by te sit.
SB 10 se konkoksie bestaan nou uit atjar olie, pietersielie-canola olie, seepsoda, water, die stokkies van 2 gebruikte rooibostee sakkies was saam met vlassaad gemaal is roos- en vanilla essens, en bloekom olie omdat ek dit in die kas het.Die resultaat was skrikwekkend! Die mengsel het so vinnig begin dik word daar was nie eers tyd om te dink nie en ek moes dit met die lepel in die lang plastiekpanne in smeer. Daar reeds het ek besef dié kombinasie van reuke is nie 'n wenner nie. Toe ek dit die volgende dag sny het die rooibosstokkies sulke skerp puntjies gemaak en ek kon myself net indink dat dit heel onaangenaam teen jou vel kan wees. Tog het ek vasgebyt en die blokke netjies in 'n boks gepak en buite gesit om te droog. Na 'n paar kon ek dit nie meer hou nie en het ek van die hele spul, insluitend die bloekom olie, ontslae geraak.
By SB11 het ek van die varktjop olie bygesit om die trasering te vertraag, dit het gewerk. Die konkoksie was atjar olie, varktjop olie, seepsoda, water, ongebruikte gemaalde koffie en vanilla essense wat so goed gewerk het in SB9 hierbo. Weer sit ek pietersielie-canola by. Hierdie keer meng ek die koffie net in die helfte van die seepmengsel in en gooi dan die ligte kleur koffie kleur terselfdertyd in Pringles houers. Met die sny slag kan ek sien dat die twee kleure wat saam gegiet is estetiese waarde tot die seep voeg, maar die reuk is nie so lekker nie. Tog sny ek dit klaar en sit dit buite om te droog. Gelukkig het dit laas naweek nat gereën en kon ek dit uiteindelik weggooi sonder dat dit my gewete te veel pla.
Uit SB10 en 11 het ek geleer dat jy moet seker maak dat jou olie nie galsterig is voordat jy daarvan probeer seep maak. Die galsterige olie maak sulke bros korrelrige seep blokke, en dit stink.

SB 12 maak ek op 1 Mei en noem dit KAMPSEEP. Dit bevat herwinde olie, neutmuskaat, borrie en sitroenella en word in melkhouer gietvorms gegiet.
Ek hou van die reuk, van die kleur en van die tekstuur, so die is 'n resep wat ek sal hou. Ek hou ook daarvat dat dit 100% herwinde olie bevat, dit dra vir my by tot die groen voetspore konsep waarmee ek werk.
Ongelukkig het ek te lank gevat voor ek dit gesny het, en ek het nog nie geweet hoe om dit met die nylon garing te sny nie, so toe ek dit met 'n mes probeer sny was dit nie 'n baie suksesvolle poging nie. Ek het die blokke net so laat droog word en toe vir my 'n krinkelsnyer op bidorbuy bestel... Ek wag nog vir dit om afgelewer te word.

SB13 Sjampoo blokke, koue roermetode

Na die warm metode sjampoe blokke wat my vinnige toegang tot 'n bruikbare produk kon gee het ek ook op 13 Mei 2016 die koue roermetode aangedurf. Ek het 10g van die water met roosessens vervang om te probeer om die reuk vas te vang en 20 druppels Bergamot bygesit vir reuk, en omdat ek oortuig is daarvan dat Bergamot fantasties is vir haargroei. Na 'n week se kuur is daar steeds 'n ligte roos reuk, en die Bergamot is nie so oordonderend in hierdie maaksel nie. Hopelik sal dit pappatjie wel geval wanneer die 6 weke kuur verby is.

Ek het 'n polistireen roomyshouer wat met bakpapier uitgevoer is as gietvorm gebruik en dit het baie goed gewerk. ek sal die boksie beslis weer gebruik in die toekoms. Die bakpapier werk ook baie lekker ek kom maklik los van die seep wanneer jy dit uit die gietvorm haal. Die mengsel begin egter baie vinnig stol nadat dit traseerstadium bereik het en jy sal redelik vinnig moet giet as jy die bokant met 'n patroontjie wil versier. In hierdie geval het ek die bokant so goed moontlik met 'n slaplemmes platgevryf.

Die nylon garing is weereens ingespan vir die snywerk en dit maak netjiese skoon snitte deur die seep. As jy met 'n mes sny bars die seep soms wanneer jy aan die onderkant van die blok kom, maar met die garing sny jy reg rondom op dieselfde tyd en ondervind jy nie die probleem nie.

Na 'n week het die seep heelwat van die groen kleur van die olyfolie verloor en die kante is nogal skerp en kan dalk ongemaklik voel in jou hand. Ek sal dit met my nutsmessie moet afrond sodat dit lekker is om te gebruik. Hierdie seep sal teen 25 Junie die ses weke kuur deurstaan het.

Sjampoo blokke, staafmenger warmproses

Sjampoe in blokke? Wat 'n vreemde gedagte...

In 2016 is ons mos gewoond aan plastiekbottels met loperige sjampoe wat opgevolg moet word met romerige opknapper, veral in die wintermaande, ook uit plastiek bottels, en jy kan geld daarop sit dat jy die helfte van die bestanddele se name nie kan uitspreek nie! Dit het nie baie gekos om my te oortuig dat sjampoe blokke uit natuurlike olies 'n opsie is om sterk te oorweeg nie, en nadat die prinses vir die soveelste maal 'n hele houer vol sjampoe in die bad uitgespuit het wou ek so vinnig as moontlik oorskakel. Ek het 'n resep vir Kampeer sjampoe-seep op Dion se gedagtes gesien, al die YouTube videos wat ek oor sjampoe-seep kon kry gekyk, en toe, ook op YouTube afgekom op dié staafmenger warmproses...

Wat 'n fantastiese gedagte, jy maak jou basiese koue roermetode resep, en nadat die seep getraseer het klits jy dit met jou staafmenger deur al die warmprosesfases en na omtrent 10 minute BEHOORT jy seep te hê wat net moet stol en dan gebruik kan word. Dit het vir my geklink na 'n plan en ek het dadelik my resep uitgeskryf.

196g klapperolie

300g olyfolie

184g kasterolie [dit is hoeveel daar uit 'n 200ml bottel kom, en ek het die hele resep basies om dié onveranderlike geskryf]

6g soet amandelolie

253g H2O

98g NAOH

10ml Soet lemoen essensiële olie en net soveel Bergamot olie

Vinnig het ek al die goetertjies in die regte volgorde gemeng en die staafmenger ingedruk en begin klits. So ses minute in die proses in is my staafmengertjie vuurwarm, maar niks in daai bak lyk soos kapok aartappels wat binnekort 'n vulkaaneffek gaan ontplooi nie. My 200W menger het net nie genoeg woema om die proses te voltooi nie. 

Op daardie stadium het ek my gewend tot die mikrogolfoond, die seepmengsel in 'n glasbak met kleefplastiek bo-oor op 20% krag 1 minuut op 'n slag totdat dit uiteindelik soos seep geruik het.

Vandaar is dit in my getroue leë melkhouer gietvorms, en paar uur later toe dit afgekoel is het ek dit gesny in ongeveer 2cm wye blokke. Ek het nylon garing wat lyk soos baie dun vislyn gebruik om die seep te sny en dit werk vir my beter as die tandevlos.

 

Na omtrent 'n week se oopstaan om van oortollige vog ontslae te raak, en omdat ek wou seker wees dat  daar nie meer aktiewe seepsoda in die blokke is nie het ek Donderdagaand besluit om die seep op die proef te stel.  Ek het eers 'n BAIE onwetenskaplike eksperiment gedoen:

My redenasie was dat enige aktiewe seepsoda sal reageer wanneer ek die seep in water sit. Ek het die droë seep se temperatuur geneem, toe die toetsblokkie in water gegooi en weer die temperatuur geneem. Daar was geen styging in die temperatuur nie. Toe het ek die sepie uit die water gehaal en opgeskuim in my hande. Geen prikkel of brandgevoel van aktiewe seepsoda nie. Nou was ek in my gemoed oortuig dat die verseping inderdaad voltooi is êrens tussen my staafmenger en my mikrogolfoond.

Gisteroggend het ek die eerste keer my hare gewas met my sjampoe blok. Ek was verbaas oor die hoeveelheid sagte skuim wat die seepblok in my hare maak. Nadat die skuim afgespoel is voel jou hare bietjie anders as met konfensionele sjampoe. Dis nie so 'seepglad' nie, maar voel meer klewerig. Wanneer ek dit droogblaas het dit baie volume en geen statiese elektrisiteit nie. Vanoggend het ek dit weer gewas, nie omdat dit vuil was nie, maar omdat dit blykbaar omtrent 'n week se was neem om van al die ou seepreste en chemikalieë in jou hare ontslae te raak, so, hoe vinniger hoe beter. Nou moet ek net 'n ander geur as Bergamot ook vind, want dié is bietjie oordonderend en my man hou niks daarvan nie!

Ek hou nogsteeds nie van die warm seepmaak proses nie en verkies die koue roermetode omdat dit 'n baie meer netjiese produk lewer en 'n meer energiedoeltreffende manier is om seep te maak. As jy egter seep in 'n kits nodig het, is dit die warm metode wat jou daar gaan kry.

Herwin oorskietseep

Hierdie was nou 'n seepmaak waarna ek lank opgesien het, omdat dit nie regtig seepmaak is nie, maar meer hergiet van ou seep.
So, op 14 Mei 2016 vat ek uiteindelik die ongeveer 1liter roomysbak vol stukkies seep uit alle oorde en maal dit fyn. die meeste van die winkelseep was so droog dat dit letterlik in poeiervorm uit die meul gekom het. Die oorskiet stukkies handgemaakte seep was meer vogtig en het tipiese vleismeul spaghetti gevorm.
Nadat ek al die seep gemaal en in my oondvaste emalje bak gesit het gooi ek net genoeg warm water oor dat dit gelyk lê met die seepvlenters. Ek sit die deksel op en laat dit oornag staan. Sondagoggend haal ek die deksel af en vind dat al my gemaalde seep een soliede koek gevorm het, kliphard en rond soos 'n seepkoek.  Ek besluit toe om nie te vinnig tou op te gooi met die proses nie en sit die hele bak net so in die oond @ 100 Celsius. Elke kort kort loer ek en stadig maar seker begin die koek smelt. Intussen begin ek met ander dinge en net toe ek lank genoeg nie loer nie; toe kook die spul oor!
Nou met ek vinnig werk, anders is die hele spul seep daarmee heen. Ek tap warm water en die wasbak en sit die emalje bak daarin. Nou roer ek die slymstorie, en dit lyk darem of daar iets van kan kom. Om op te maak vir al die gliserien wat verlore gegaan het in die winkelseep vervaardiging gooi ek 2 eetlepels vol gliserien by. Dit roer mooi in, en niks het nog gestol nie, maar die seep is so lelik, so snaakse grysblou kleur van al die stukkies wat nou gemeng het. Om 'n meer uniforme kleur te probeer kry gooi ek 'n teelepel borrie by en roer dit deur. Met my seep nou 'n gelerige slymerige spul met vlekkies wat dit amper soos graniet laat lyk giet ek dit in oopgesnyde 1liter melkhouers, sit dit eenkant om af te koel en begin met die skoonmaakproses.
Nadat ek al die houers en die oondrakke en die lekbak gewas het tree my ongeduldige self na vore en ek sit die houers met seep buite, aangesien laas naweek se weer voordelig was om enige iets af te koel. Na 'n paar uur is die seep so dat ek dit uit die gietvorms kan haal. Ek sny die blokke in kleiner dele met tandevlos, en dit werk heel effektief. Die twee melkhouers lewer 16 blokke wat min of meer 2cm dik is.


Na 'n week se droging lyk die geel bietjie meer groen, maar dit ruik nogsteeds baie soos winkelseep. Dis ook bietjie minder geel, en meer van 'n blou-groen tipe kleur. Dit is egter nog redelik vogtig, ek dink dit moet nog ten minste twee weke droog voor dit weggegee kan word.

Ek hou nie eintlik van die proses nie omdat jy die seep moet warm maak, en dit dan so dikkerige slymerige massa raak.Die hele verhitting ding haal vir my die 'groen' uit die herwinning uit, want alhoewel jy nou weer bruikbare seepkoekies vorm uit weggooi stukkies gebruik jy elektrisiteit in die proses. Ek veronderstel as jy nou die som gaan maak van hoeveel die uur se oondkrag kos, teenoor hoeveel handjies met daardie seep gewas kan word en hoeveel siektes voorkom kan word, sal die herwinning tog koning kraai, veral as jy die kostes van medisyne, produktiwiteitsverlies ens. ook begin optel.
Volgende keer moet ek net die oond nog koeler stel want dit vat nie baie hitte om seep te laat smelt nie.